ခရမ်းသီးရဲ့ ဆိမ့်ဆိမ့်လေးနဲ့ ချိုတဲ့ အရသာကို ဖုတ်ပြီး သုပ်စားတဲ့အခါ ပိုပြီး ပေါ်လွင်စေပါတယ်။ ခရမ်းသီးမှာ အမျိုးမျိုး ရှိပါတယ်။
မီးဖုတ်သုပ်တဲ့ အခါ ထောပတ်ခရမ်းလို့ ခေါ်တဲ့ အ၀ိုင်းသီးဟာ ပိုကောင်းပါတယ်။ ခရမ်းသီးဟာ အ၀လွန်ရောဂါနဲ့ နှလုံးရောဂါတွေကို သက်သာစေနိုင်ပြီး အခွံမှာ အမျှင်ဓာတ်တွေ ပါဝင်ပါတယ်။ သွေးထဲက ကိုလက်စထရောကို လျှော့ချပေးနိုင်တဲ့ အသီးပါ။
eggplant-little-green
ခရမ်းသီးဟာ ကိုလက်စရောဓာတ်ကို လျော့ကျပေးပါတယ်။ နှလုံးရောဂါ ရှိသူများ စားသင့်ပါတယ်။ ဝမ်းဗိုက်အတွင်းမှာ ဖြစ်တဲ့ အနာတွေ မဖြစ်အောင် ကာကွယ်ပေးပါတယ်။ အာရုံကြော ရောဂါများအတွက် ကောင်းမွန်ပါတယ်။ ကူးစက်ရောဂါများ အတွက်လည်း ကောင်းမွန်ပါတယ်။ ကင်ဆာရောဂါ မဖြစ်အောင် ကာကွယ်နိုင်စွမ်း ရှိပါတယ်။
မှတ်ဥာဏ်ကောင်းစေ ပါတယ်။ သွေးများကို သန့်ရှင်း စင်ကြယ်စေပါတယ်။ သတိထားရမယ့် အချက်ကတော့ ကျောက်ကပ်မှာ ကျောက်တည်နေသူတွေ ခရမ်းသီး မစားသင့်ပါဘူး။
ခရမ်းသီးမှာ ပါတဲ့ Oxalates က ကျောက်ကပ်ကို ဒုက္ခဖြစ်စေနိုင်လို့ပါ။
ခရမ်းသီးမီးဖုတ်သုပ်မှာ လိုအပ်တာတွေကတော့ နည်းပြီး လွယ်ကူပါတယ်။ ထောပတ် ခရမ်းသီးတစ်လုံး ဒါမှမဟုတ် မီးဖုတ်ဖို့ အိမ်မှာ အခက်အခဲ ရှိတယ်ဆိုရင်တော့ ဖုတ်ပြီးသား ခရမ်းသီးတစ်လုံး ၀ယ်ပါ။
အခုဆိုရင် အချို့ဈေးတွေမှာ ဖုတ်ပြီးသား အဆင်သင့်ရောင်းနေပါပြီ။
မီးဖုတ်လို့ အဆင်မပြေရင် ထမင်းအိုးထဲမှာ ထည့်ပြီး အုန်းလို့ ရပါတယ်။ ထမင်းအိုး အရည်ငှဲ့ချက်ပြီး ပြန်နှပ်တဲ့ အချိန်မှာ ခရမ်းသီးကို ထည့်ပြီး အုန်းထားတာပါ။
ကြက်သွန်မြိတ် အနည်းငယ်နဲ့ နံနံပင် အနည်းငယ် လိုပါတယ်။ ဆီကတော့ ပိုဆိမ့်အောင် ရိုးရိုး ဆီစိမ်း သုံးပါတယ်။ ဆားအနည်းငယ်လိုပါတယ်။ ကြက်သားမှုန့်ကတော့ မလိုသလောက်ပါပဲ။ သဘာဝ အချိုကို ဦးစားပေးတဲ့အတွက် သိပ်တော့ မလိုပါဘူး။ ကြက်သွန်နီ ၂လုံးခန့် လှီးထားပါ။ အစပ်ကြိုက်ရင်တော့ ငရုတ်သီးစိမ်း အနည်းငယ် ထည့်ပါ။
ပြုလုပ်ပုံကလည်း လွယ်ကူပါတယ်။ ခရမ်းသီး မီးဖုတ်ကို ဇွန်းနဲ့ အသာ ခေါက်ပါ။ ကြက်သွန်နီနဲ့ ဆီ၊ ဆားတွေကို အချိုးကျထည့်ပြီး နယ်ပေးပါ။ ပြီးရင် ကြက်သွန်မြိတ်နဲ့ နံနံပင်ကို အပေါ်ကနေ ဖြူးပေးပါ။
အခုဆိုရင် လွယ်ကူပြီး အရသာ ရှိတဲ့ ခရမ်းသီး မီးဖုတ်သုပ်လေး ရပါပြီ။
