စိတ်ရှုပ်ထွေးရတဲ့ အိပ်မက်မျိုး မက်ပြီး မလန်းမဆန်းနဲ့ နိုးထလာရတဲ့ ရက်မျိုး ကြုံဖူးကြမယ် ထင်ပါတယ်။ များသော အားဖြင့် အမြင့်ပေါ်က ပြုတ်ကျတာ၊ လေပေါ်ပျံနိုင်တာ၊ သွားတွေ ကျွတ်ထွက်ကုန်တာ၊ စာမေးပွဲ မဖြေနိုင်တာ၊ ချိန်းဆိုထားတဲ့ အချိန်နောက်ကျတာ၊ သူစိမ်း တစ်ယောက်က အနောက်က လိုက်လို့ အသည်း အသန်ပြေး ရတာ မျိုးက လူတိုင်းလိုလို မက်ကြတဲ့ အိပ်မက်မျိုးပါပဲ။ ဒီလိုအိပ်မက်တွေ မက်တဲ့အခါ တကယ့်အပြင်မှာ ခံစားနေရ သလိုမျိုး စိတ်မွန်းကြပ်၊ စိတ်ရှုပ်ထွေးပြီး နိုးထလာရင်လည်း စိတ်ကလန်းဆန်း တက်ကြွမှု မရှိတော့ဘဲ အိပ်မက်က ဘာရှေ့ပြေး နိမိတ်ဖြစ်နေမလဲဆိုပြီး စိတ်တွေ လေးလံ ထိုင်းမှိုင်းနေတတ်ပါတယ်။ အမှန်တကယ်တော့ အိပ်မက်တွေက သင့်ရဲ့ စိတ်က ဖန်တီးလိုက်တဲ့ အရာတွေပါ။ ဒါဆို ဘာလို့ ဒီလိုအိပ်မက်တွေ မကြာခဏ မက်နေရတာလဲ? ဆေးပညာရှင်များရဲ့ လေ့လာချက်တွေအရတော့ ဒီလို စိတ်ဂယောက်ဂယက်ဖြစ်စေတဲ့ အိပ်မက်တွေက သင့်ရဲ့ ကျန်းမာရေး ဆိုင်ရာပြဿနာများနဲ့ စိတ်ပိုင်းဆိုင်ရာနဲ့ ပတ်သတ်ဆက်နွယ်မှု ရှိနေတယ်လို့ ဆိုပါတယ်။
အမြင့်တစ်နေရာကနေ အောက်ကို ရုတ်တရက်ဆိုသလို၊ ပြုတ်ကျသွားတဲ့အခါ လူတစ်ကိုယ်လုံး ဆတ်ခနဲဖြစ်သွားပြီး လန့်နိုးသွားတဲ့ သူတွေလည်း ရှိသလို၊ အိပ်မက်ကနိုးမထနိုင်ဘဲ တကယ့်အပြင်မှာ ဖြစ်နေသလိုမျိုး ကြောက်ရွံ့ တုန်လှုပ်ကြတဲ့ သူတွေရှိပါတယ်။ ဒီလိုအမြင့်ပေါ်က ပြုတ်ကျတဲ့ အိပ်မက်ကို မက်ရတဲ့အကြောင်းအရင်းကတော့ သင်အစီအစဉ်ဆွဲထားတဲ့ ကိစ္စရပ်တွေက မျှော်လင့်ထားသလိုဖြစ်မလာတာ၊ စိုးရိမ်ပူပန်မှု များနေတာတွေကြောင့်ပါ။ အလုပ်နဲ့ပတ်သတ်တဲ့ ပရောဂျက်တွေ မနိုင်တော့တဲ့အခါ၊ ကျောင်းစာတွေကို မလိုက်နိုင်တော့တဲ့အခါ ကိုယ့်ကိုယ်ကို ယုံကြည်မှု လျော့နည်းပြီး မက်ရတဲ့ အိပ်မက်မျိုးပါပဲ။ ရှေးလူကြီးတွေကတော့ ဒီလိုအမြင့်က ပြုတ်ကျတဲ့ အိပ်မက် ကိုတော့ ကျရှုံးခြင်းရဲ့ ရှေ့ပြေးနိမိတ်အဖြစ် သတ်မှတ်ကြပါတယ်။
အပြင်မှာ တခါမှ မမြင်ဖူး၊ မတွေ့ဖူးတဲ့ သူစိမ်းတစ်ယောက်က ကိုယ့်နောက်ကို လိုက်နေလို့ ကြောက်လန့် တကြား ပြေးရတဲ့ အိပ်မက်မျိုး မက်ဖူးလား? နောက်ကနေ လိုက်နေလို့ ထွက်ပေါက်ကို ရှာမတွေ့ဘဲ အခန်းထဲမှာ ပြေးနေ ရတာမျိုးလည်း ရှိသလို၊ ကိုယ်မရောက်ဖူးတဲ့ နေရာတွေ၊ လမ်းတွေ ပေါ်မှာ ရှောင်ပြေးနေရတာမျိုးပေါ့။ ဒါဆိုရင်တော့ သင်ဟာ သင့်ပတ်ဝန်းကျင်က လူတွေနဲ့၊ သင့်ကို စိတ်ရှုပ်ထွေးစေတဲ့ ကိစ္စ၊ ပြဿနာတွေရဲ့ အဝေးကို ပြေးထွက် ချင်နေပြီး စိတ်ဖိစီးမှုကို ခံစားနေရသူပါ။ ကိုယ်လိုချင်တဲ့ပန်းတိုင်ကို အရောက်လှမ်းဖို့ အားလျော့နေတတ်တဲ့ အချိန်မျိုးမှာ ဒီလိုအိပ်မက်မျိုးကို မက်တတ်ပါတယ်။
အကြောင်းမဲ့ သွားတွေအကုန် ကျွတ်ထွက်သွားပြီး သွားကျိုးတဲ့ အိပ်မက်ကလည်း တကယ့်ကို စိတ်ကသိကအောက် ဖြစ်ရတဲ့ အိပ်မက်မျိုးပါပဲ။ ဒီလိုအိပ်မက်မျိုးကို မကြာခဏ မက်နေတယ် ဆိုတာကတော့ သင်ဟာ ပတ်ဝန်းကျင်ရဲ့ အမြင်ကို ဂရုစိုက်လွန်းသူလို့ ဆိုရပါမယ်။ လူတွေရဲ့ အမြင်ကို အလေးထားလွန်းပြီး မိမိကိုယ်ကိုစိတ်ပျက်အားငယ်တဲ့ အချိန်တွေမှာဆိုရင် သွားတွေကျွတ်ထွက်တဲ့ အိပ်မက်မျိုး မက်တတ်ပါတယ်။ သွားကျိုးတဲ့ အိပ်မက်က ကိုယ့်ရဲ့ ဆွေမျိုးသားချင်း တစ်ယောက်ယောက်က အပြင်းအထန်ဖျားမယ်၊ ဒါမှမဟုတ် သေဆုံးမယ်လို့ ရှေးခေတ်ဂရိ လူမျိုး များ က အိပ်မက်နိမိတ်ဖတ် ခဲ့ကြပါတယ်။ တရုတ်လူမျိုးများရဲ့ အယူအရတော့ လျှို့ဝှက်ချက်များလွန်း တဲ့သူတွေ မက်လေ့မက်ထရှိတဲ့ အိပ်မက်မျိုးလို့ မှတ်ယူကြပါတယ်။
အဝတ်ဗလာနဲ့ လူတွေရှေ့မှာ ရှက်ရွံ့နေရတဲ့ အိပ်မက်ကိုလည်း လူအများစု မက်ဖူးကြပါတယ်။ အများဝေဖန်တာကို ကြောက်ရွံ့နေတဲ့အခါ၊ မိမိကိုယ်ကိုယုံကြည်မှု လျော့နည်းနေတဲ့ အချိန်မျိုးမှာ ဒီလိုအိပ်မက်ကို မက်ရခြင်းပဲ ဖြစ်ပါတယ်။ စာမေးပွဲ မဖြေနိုင်တာ၊ စာမေးပွဲအချိန်နောက်ကျရတဲ့ အိပ်မက်မျိုးကို ကျောင်းသား၊ ကျောင်းသူ များသာမက အသက်အရွယ်မရွေး မက်နေတတ်ပါတယ်။ ကိုယ်မသိတဲ့ ဘာသာရပ်တွေကို စာမေးပွဲဖြေနေရတာ၊ စာမေးပွဲဖြေဖို့ အချိန်နောက်ကျနေတာမျိုးဆိုရင် သင်ဟာ စိတ်ရှုပ်ထွေးနေပြီး လိုချင်တဲ့ပန်းတိုင်ကို ရောက်ဖို့ စိတ်ပျက် အားလျော့နေ တဲ့ အချိန်တွေမှာ ဒီလိုအိပ်မက်ကို မက်တတ်ပါတယ်။
