ဘုန်းကြီးကျောင်းတွင်း ဖိနပ်စီးခြင်း

အထက်ဖော်ပြပါ ခေါင်းစဉ်နဲ့ပတ်သတ်၍ ဗုဒ္ဓဘာသာလူမျိုးများ၌ အတော်လေးကို သံသယဖြစ်နေကြပေသည်။ ရှေးရှေးသော လူကြီးများက ဘုန်းကြီးကျောင်းဝင်းအတွင်း ဖိနပ်မစီးနဲ့ ဗိမ္ဗိသာရမင်းကြီးကဲ့သို့ ခြေဖဝါးကို ဓါးနဲ့ခွဲခံရမယ်ဆိုပြီး ပြောဆိုခဲ့သောကြောင့် ဗုဒ္ဓဘာသာဝင်များ ဖိနပ်မစီးရဲကြပေ။ သို့သော် ဗိမ္ဗိသာရမင်းသည် အဘယ့်ကြောင့် ခြေဖဝါးကို ဓါးနဲ့အခွဲခံရသည်ကိုတော့ သေချာကျနစွာ သိရှိနားလည်သူက နည်းပါးပေသည်။

တကယ်တော့ ဗိမ္ဗိသာရမင်းသည် ဘုန်းကြီးကျောင်းဝင်းထဲတွင် ဖိနပ်စီးခဲ့၍ ခြေဖဝါးကို ဓါးဖြင့်ခွဲခံရခြင်း မဟုတ်ပါပေ။ ဘုရားစေတီတော်ရင်ပြင်ပေါ်ဝယ် ဖိနပ်စီးခဲ့ခြင်းကြောင့် ဖြစ်ပေသည်။ ထို့ပြင် ဗိမ္ဗိသာရမင်းသည် ရဟန်းသံဃာများ သီတင်းသုံးနေထိုင်ရန် ခင်းထားသောအခင်းပေါ် ခြေဆေးခြင်းမရှိဘဲ ညစ်ပေသော ခြေထောက်ဖြင့် နင်းခဲ့ခြင်းအကုသိုလ်ကံကြောင့် ယခုမျက်မှောက်ဘဝတွင် ခြေဖဝါးကို ဓါးဖြင့်ခွဲခံရခြင်း ဖြစ်သည်။ ထို့ကြောင့် ဘုန်းကြီးကျောင်းများတွင် ကျောင်းထိုင်သံဃာများက ခွင့်ပြုလျှင် စီးကောင်းပါသည်။

လက်ရှိ ဗုဒ္ဓဘာသာများသည် တကယ်အလေးထားရမည်ကို အလေးမထားဘဲ မဖြစ်စလောက်လေးကိုတော့ အလေးထား၍ ပြုလုပ်လိုက်နာကျင့်သုံးနေကြပေသည်။ တကယ်စဉ်းစားကြည့်လျှင် ဘုန်းကြီးကျောင်းပေါ်တွင် ဖိနပ်မစီးဘဲ ညစ်ပေသောခြေထောက်ဖြင့် တက်လျှင်သာ သံဃိကကျောင်း ညစ်ပေသောကြောင့် အပြစ်ရှိပေသည်။ ဘုန်းကြီးကျောင်းဝင်းအတွင်း ဖိနပ်စီးလျှင် အပြစ်ရှိတယ်ဆိုလို့ လိုက်နာကြသော်လည်း ကျောင်းဝင်းအတွင်း တံတွေးထွေးခြင်း၊ ကျင်ကြီးကျင်ငယ်စွန့်ခြင်း၊ အမှိုက်ပြစ်ခြင်းစတဲ့ ညစ်ပေသောအမှုကိစ္စကိုများတော့ အလွယ်တကူ ပြုလုပ်ကြပေသည်။ တကယ်စဉ်းစားကြည့်လျှင် မည်သည့်အရာက ပိုမို၍ အပြစ်ရှိသည်ကို သိနိုင်လိမ့်မည် ထင်ပါသည်။

ထို့ပြင် ဗုဒ္ဓဘာသာများသည် ဘုန်းကြီးကျောင်းဝင်းအတွင်း ဖိနပ်စီးလျှင် အပြစ်ရှိတယ်လို့တော့ ယူဆကြပါတယ်။ သို့သော်လည်း ကားဆိုင်ကယ်စက်ဘီးဖြင့် ဖိနပ်စီးလျှက် ဝင်နေကြပေသည်။ တကယ်လို့သာ ကျောင်းဝင်းအတွင်း ဖိနပ်စီးလျှင် အပြစ်ရှိပါက ထိုသို့ကားများပေါ်တွင် ဖိနပ်စီးခြင်းသည်လည်း အပြစ်ရှိပေလိမ့်မည်။

မြတ်စွာဘုရား သက်တော်ထင်ရှားရှိစဉ်အခါက မဟာရာဇာအမည်ရှိသောမင်းသည် သံဃာတော်များ စကြံကြွနေသည့်နေရာတိုင်အောင် ဖိနပ်စီးကာ သံဃာတော်များအား ဘုရားရှင် အဘယ်မှာ သီတင်းသုံးနေသလဲလျှောက်သောအခါ သံဃာတော်များက ဘုရားရှင် ကျောင်းပေါ်၌သီတင်းသုံးနေသည်ဟု ဖြေကြားသောအခါမှသာ ဘုရားရှင်ရှိရာ ကျောင်းပေါ်သို့တက်ခါနီးတွင် ဖိနပ်ချွတ်ခြင်း၊ မင်းဝတ်တန်ဆာများ ချွတ်ထားခြင်းတို့ကိုထောက်ဆ၍လည်းကောင်း၊ ဗိမ္ဗိသာရမင်းသည် ဘုရားရင်ပြင်ပေါ်ဝယ် ဖိနပ်စီးခဲ့ခြင်း၊ သံဃာတော်များ သီတင်းသုံးရန်အတွက် ခင်းထားသောအခင်းပေါ်၌ ညစ်ပေသော ခြေထောက်ဖြင့် နင်းခဲ့ခြင်းတို့ကို ထောက်ဆလျှင် ကျောင်းဝင်းအတွင်း တလင်ပြင်ပေါ်ဝယ် ဖိနပ်စီး၍ ရပါသည်။

မိထွေးတော်ဂေါတမီနှင့် မင်းသမီးငါးရာတို့သည် ဘိက္ခနီဝတ်ရန် ကျောင်းတော်သို့သွားသောအခါ ဘုရားရှင်ကို အရိုအသေ ကင်းမဲ့ရာရောက်မည်ဆိုး၍ ယာဉ်ရထားမစီးဘဲ ခြေလျင်သွားခဲ့သည်ကိုထောက်လျှင် မိမိတကယ် ရတနာသုံးပါးကို ရိုသေလေးစားပါက ဖိနပ်၊ ယာဉ် မစီးဘဲ ကျောင်းဝင်းသို့ဝင်လျှင်တော့ ကောင်းပါသည်။ သို့သော် ကျောင်းပေါ်၊ ဘုရားရင်ပြင်ပေါ်သို့ တက်မည်ဆိုလျှင်တော့ ခြေဆင်းပြီးမှ တက်သင့်ပါသည်။ မိမိ၏ ကျန်းမာရေးကြောင့် ရတနာသုံးပါးကို ရိုသေလေးစားသော်လည်း ကျောင်းဝင်းအတွင်း ဖိနပ်စီးခြင်း၊ ယာဉ်စသည်စီးခြင်းတို့သည် အပြစ်မရှိ၍ ပြုလုပ်နိုင်ပါသည်။

ယခုခေတ် လူငယ်များသည် များသောအားဖြင့် ဘုန်းကြီးကျောင်းများတွင် ဖိနပ်ချွတ်ရမည်ကို ဝန်းလေးနေကြသည်။ ဖိနပ်ချွတ်ရမည့်ကိစ္စကြောင့် တစ်ချို့ဆိုလျှင် ဘုန်းကြီးကျောင်းကိုပင် မသွားချင်ကြပေ။ သူတို့၏ ခြေထောက်များ ဘာများဖြစ်သွားမလဲလို့များ စိုးရိမ်နေကြတယ် ထင်ပါတယ်။ အဲဒီလို ဘုန်းကြီးကျောင်းဝင်းအတွင်း ဖိနပ်ချွတ်ရန် ဝန်းလေးနေသည့် လူငယ်များအတွက် ယခုပို့စ်လေးက အကျိုးရှိမည်ထင်ပါသည်။

Credit – Original Uploader