အလုပ်ရဲ့နောက်ဆုံးနေ့မှာ ရုံးတွင်းမဖြစ်မနေပြုလုပ်သွားသင့်တဲ့အရာတွေ

ကိုယ့်ရဲ့တက်လမ်းအတွက်၊ ပိုမိုကောင်းမွန်တဲ့ ဘဝကို ရရှိဖို့အတွက် နေရာတစ်နေရာထဲမှာ ရပ်နေလို့ မရပါဘူး။ ကိုယ့်အတွက် အခွင့်အလမ်းပိုရမယ့် နေရာကို အပြောင်းအရွှေ့ပြုလုပ်ပြီး စိန်ခေါ်မှုတွေကို ရင်ဆိုင်နိုင်ဖို့ လိုပါတယ်။ ဒါ့ပေမယ့် ကုမ္ပဏီတစ်ခုပြီး တစ်ခု၊ အလုပ်ပြောင်းတဲ့အခါမှာ ကိုယ်လုပ်ခဲ့တဲ့ ရုံးမှာ နာမည်ကောင်းကျန်ရစ်ဖို့ကလည်း အရေးကြီးပါတယ်။ ကိုယ်ချစ်ရတဲ့ လုပ်ဖော်ကိုင်ဖက်များနဲ့ ခွဲခွာပြီး တခြားအလုပ်အသစ်ကို ပြောင်းရတဲ့အခါ စိတ်ပင်ပန်းပြီး စိတ်ဖိစီးမှုများရတာကတော့ သဘာဝပါပဲ။ ဒါ့ကြောင့် ရုံးရဲ့နောက်ဆုံးရက်မှာတော့ သင်မဖြစ်မနေ၊ မမေ့မလျော့ပြုလုပ်သွားသင့်တဲ့ အရာလေးတွေကို အကြံပေးချင်ပါတယ်။

(၁) အထက်လူကြီးကိုကျေးဇူးတင်စကားဆိုပါ

ကိုယ့်ရဲ့လုပ်ငန်းခွင်က အထက်လူကြီးနဲ့ သီးသန့်တွေ့ဆုံဆွေးနွေးတာမျိုး ပြုလုပ်ခဲ့ဖို့ မမေ့ပါနဲ့။ ဒီလုပ်ငန်းမှာ ကိုယ်ရခဲ့တဲ့ အတွေ့အကြုံတွေကို ပြန်လည် sharing လုပ်ပြီး ရခဲ့တဲ့ အခွင့်အရေးတွေ အတွက်လည်း ကျေးဇူးတင်စကားဆိုပါ။

(၂) လုပ်ဖော်ကိုင်ဖက်များကို နှုတ်ဆက်ပါ

အနှစ်နှစ်အလလ ပူးပေါင်းလုပ်ဆောင်ခဲ့ကြတဲ့ လုပ်ဖော်ကိုင်ဖက် တစ်ယောက်ချင်းစီတိုင်းကို နှုတ်ဆက်စကားဆိုပါ။ အကြောင်းအမျိုးမျိုးကြောင့် ကိုယ်နဲ့သိပ်အဆင်မပြေခဲ့တဲ့ သူတွေအပေါ် ကိုလည်း အဆိုးမြင်စိတ်တွေမေ့ ဖျောက် ပစ်ပြီး အကောင်းမြင်စိတ်နဲ့ ပျော်ပျော်ရွှင်ရွှင် နှုတ်ဆက်ခဲ့ဖို့ မမေ့ပါနဲ့။

(၃) တာဝန်ကျေပွန်အောင်လုပ်ခဲ့ပါ

သင်ရဲ့ လုပ်ငန်းဆောင်တာ၊ ပရောဂျက်တွေ၊ တာဝန်တွေကို အပြီးသတ်လုပ်ပေးခဲ့ပါ။ အလုပ်ရဲ့ နောက်ဆုံးနေ့က ဘယ်လောက်ပဲ စိတ်ဖိစီးမှု များတယ်ဆိုပေမယ့် ကိုယ့်ရဲ့တာဝန်ကိုတော့ ကျေပွန်အောင်ပြုလုပ်ခဲ့ပြီး အလုပ်ကြိုးစားသူအဖြစ် နာမည်ကောင်းကျန်ရစ်ခဲ့ဖို့ လိုပါတယ်။

(၄) ဖုန်းနံပါတ်တောင်းပါ

လုပ်ဖော်ကိုင်ဖက်၊ အထက်အရာရှိတွေကို ဆက်သွယ်နိုင်တဲ့ လိပ်စာ၊ ဖုန်းနံပါတ်တွေကို တောင်းထားပါ။ တစ်ချိန်မှာ လုပ်ငန်းပူးပေါင်းလုပ်ကိုင်ဖို့ လိုလာမယ်လို့ ဘယ်သူက ကြိုသိနိုင်မှာလဲ။

(၅) ရုံးစားပွဲကိုသပ်ရပ်စွာရှင်းလင်းခဲ့ပါ

သင်နေ့စဉ်အသုံးပြုခဲ့တဲ့ ရုံးကပစ္စည်းမှန်သမျှကို သေသပ်စွာထားရှိခဲ့ဖို့လည်း မမေ့ပါနဲ့။ ရုံးခန်းကို သန့်ရှင်းအောင် ပြုလုပ်ခဲ့ပြီး စာရွက်စာတမ်း၊ အံဆွဲ၊ ကွန်ပျူတာ စတာတွေကို သေချာရှင်းလင်းခဲ့ပါ။

(၆) Personal Information တွေအကုန်ဖျက်ပါ

သင်ရဲ့ စက်ထဲက၊ ကွန်ပျူတာထဲက Personal Information မှန်သမျှကို အကုန်ဖျက်ခဲ့ဖို့ လိုပါတယ်။ သင့်နဲ့ပတ်သတ်တဲ့ သတင်းအချက်အလက်တွေတိုင်းကို ရှင်းလင်းပြီး ကွန်ပျူတာရဲ့ Browser ထဲက History ကို အကုန်ရှင်းလင်းခဲ့ဖို့ မမေ့ပါနဲ့။

(၇) သင်ချစ်ရတဲ့သူများနဲ့ နှုတ်ဆက်ပွဲလုပ်ပါ

သင်ချစ်ရတဲ့ လုပ်ဖော်ကိုင်ဖက်တချို့နဲ့ ညစာအတူစားပြီး၊ နှုတ်ဆက်ပွဲပြုလုပ်ပြီး အတွေ့အကြုံတွေကို ပြန်လည် Sharing လုပ်နိုင်ပါတယ်။ လုပ်ဖော်ကိုင်ဖက်များနဲ့ ပျော်ပျော်ရွှင်ရွှင်လမ်းခွဲလိုက်တာမျိုး ဖြစ်သင့်ပါတယ်။