အတက်အကျများတဲ့ လောကဓံကို ဂျိုနဲ့လားလို့ ပြန်မေးကြည့်ရအောင်။ တချို့နည်းလေးတွေက တကယ်အလုပ်ဖြစ်တယ် သိလား။ ဘာတွေလဲ သိရအောင် ဖတ်ကြည့်နော် …
♦ အရင်တုန်းက သီချင်းဟောင်းလေးတွေ၊ ခေတ်စားခဲ့ဖူးတဲ့သီချင်းတွေ ပြန်နားထောင်ကြည့်။
” ညနေခင်းရဲ့လေပြည်ထဲမှာ … မင်းဆံနွယ်တွေ တောင်ပံဖြန့်တဲ့အခါ … ” အဲဒါမျိုးလေးတွေ နားထောင်မိရင် ပြန်ငယ်သွားပြီး လန်းသွားသလို ခံစားရတယ်။ သင်အကြိုက်ဆုံးသီချင်းရော … ရှိဖူးလား။
♦ ဘယ်သူ့မှ ရင်ဖွင့်ရာမရှိရင် စာရွက်တစ်ရွက်ယူပြီး ကောက်ရေးပစ်လိုက်ပါ၊ ချဉ်တဲ့သူတွေကို ပက်ပက်စက်စက် ကလော်ဆဲပါ။ ဒုက္ခပေးတဲ့သူနာမည်တွေကို စာနဲ့ရေးဆဲပါ။ နှုတ်ကလည်း ရွတ်ပါ။ ပြီးရင် ဆဲစာတွေကိုတော့ လွင့်ပစ်ဖို့ မမေ့ပါနဲ့။
♦ ရည်းစားစာတွေ ပြန်ဖတ်ပါ။ အဲဒီလို အီးမေးလ်တွေကို folder တစ်ခု ဖွင့်ပါ။ လက်ရေးစာအိတ်နဲ့ စာတွေကို ချောင်တစ်ချောင်မှာ ထိုးထားလိုက်ပါ။ စိတ်ညစ်ရင် ပြန်ဖတ်ပါ။ ပြီးရင် တဟီးဟီးခွီပါ။ တစ်ယောက်တည်း ခွီလို့အားမရရင် သူငယ်ချင်းတွေဆီ ဖုန်းဆက်ပြီး အခွီတွေကို ဖုန်းဘေလ်ကုန်ခံ မျှဝေလိုက်ပါ။ ဘယ်သူက ဘယ်လိုကြောင်ပြီး ငါ့ဆီ ဘယ်လိုလေး ရေးခဲ့ဖူးပါတယ်ပေါ့။ စိတ်ရောမှန်ရဲ့လား မသိဘူးနော်တို့ … ဘာတို့။ တကယ်တော့ အချစ်ဟောင်းတွေဆီက အီးမေးလ်တွေ၊ စာတွေက လူကို နုပျိုသွားစေသလားလို့။
♦ ပုံဆွဲပါ။ အထူးသဖြင့် အကြိုက်ဆုံးမင်းသားတွေရဲ့ပုံတွေကို ကူးဆွဲပါ။ ကြောင်က ကျားဖြစ်၊ ကြွက်က ဆင်နဲ့တူလောက်အောင် စကေး သိပ်ကြမ်းရင်လည်း ဆက်သာ ဆွဲပါ။ ပြီးရင် အိပ်ခန်းထဲမှာ ကပ်ထားပါ။ သင်ကြိုက်ခဲ့ဖူးတဲ့မင်းသားတွေသာ သူတို့ပုံကို သင်ဆွဲတဲ့ပုံကိုမြင်ပြီး ချက်ချင်း တိုင်နဲ့ခေါင်းနဲ့ ဆောင့်သေချင်လောက်အောင် ဖန်တီးနိုင်စွမ်း ပက်ပက်စက်စက် အားကောင်းပါစေ။
♦ အမေ့ပိုက်ဆံအိတ်ထဲက မုန့်ဖိုးနှိုက်နေတုန်း အဖေ မိသွားတဲ့အချိန်တို့။ ရည်းစားနဲ့ ကျူနေတုန်း အဘွားက လှမ်းကြည့်ပြီး နင့်အသံက ညောင်ညိညိနဲ့ ဘာတွေပြောနေတာတုန်း မေးတဲ့အချိန်။ ကိုယ့်ကိုယ်ကို ဂရုစိုက်ပြီး သိမှုမှတ်ဉာဏ် ပြန်တည်ဆောက်လိုက်တဲ့အခါ အရှိအတိုင်း မြင်လာတယ်။ အနေရခက်ခဲ့ဖူးတာလေးတွေ ပြန်တွေးကြည့်။ အခု ဟာသဖြစ်ခဲ့ပြီ မဟုတ်လား။
♦ ငယ်ငယ်က ဓာတ်ပုံလေးတွေ ပြန်ကြည့်ပါ။ ငယ်ငယ်ကချောပြီး ကြီးမှ ကျက်သရေ တုံးသွားတယ်လို့ ပြောတတ်တဲ့ ပြောမနာ ဆိုမနာသူငယ်ချင်းတွေကို ကျေးဇူးတင်လိုက်ပါ။ သူတို့ ပြောတာ မှန်၊ မမှန် သိရအောင် ဖိုတိုဟောင်းတွေ ပြန်ရှုစားပါ။
♦ ကာရာအိုကေသွားပါ။ ကိုယ့်သီချင်းသံကို အားနာပါးနာ နားထောင်မယ့် ပရိသတ်တစ်ယောက် သူငယ်ချင်းကို ခေါက်ဆွဲကြော် ကျွေးပြီး ခေါ်ပါ။
♦ အိမ်သန့်ရှင်းရေးလုပ်ပါ။ တစ်ကိုယ်ရည် သန့်ရှင်းရေး၊ ပတ်ဝန်းကျင် သန့်ရှင်းရေးလုပ်ပါ။ အပျင်းမကြီးပါနဲ့။ အတူနေမိသားစုနဲ့ ကျန်းမာသပ်ရပ်တဲ့ အနေအထိုင်ဟာ လူကို အထူးစိတ်ရွှင်လန်းစေမှာပါ။ မိဘက အမြင်ကြည်လာသလို ငါ တော်တော်သန့်လာပြီဆိုတဲ့ ခံစားချက်နဲ့ အသက်ဆက်ရှင်လို့ရပါပြီ။
ဂျီပီငှက် (ဆေး/မန်း)
==========
DrMyanmar
